މާލެ
ފައިނު
އިމްސާކް
04:14
04:14
ފަތިސް
04:34
04:34
އިރުއަރާ
05:52
05:52
މެންދުރު
12:09
12:12
އަޞްރު
15:32
15:35
މަޣްރިބް
18:17
18:22
ޢިޝާ
19:35
19:41
ފޮޓޯ: މީސްމީޑިއާ

މަޑުއްވަރީ މިސްކިތެއްގެ އިމާމް ވަޒީފާއިން ވަކިކުރުމުން ކައުންސިލުން އެކަން ކުށްވެރިކޮށްފި

ރ. މަޑުއްވަރީ މަސްޖިދުލް އަމާނާގެ މުދިމް ވަޒީފާއިން ވަކިކޮށްފައިވާތީ އެކަން އެރަށު ކައުންސިލުން ކުށްވެރި ކޮށްފިއެވެ.

އިސްލާމިކް މިނިސްޓްރީގެ ދަށުގައި މަސައްކަތް ކުރަމުން ދިޔަ އެ މުވައްޒަފު ވަޒީފާއިން ވަކިކުރި ކަމުގެ ޗިޓް ކައުންސިލަށް ފޮނުވާފައިވާތީ އެކަމާއި ގުޅޭގޮތުން ކައުންސިލުންވަނީ ބަޔާނެއް ނެރެފައެވެ.

އެ ބަޔާނުގައި ކައުންސިލުން ބުނެފައިވަނި، ދީނީ ގޮތުން ހަރުކަށި ފިކުރުގެ މީހުން އެ ރަށުގައި އުޅޭކަމަށް ބުނެ ސަލާމަތީ ބާރުތަކުން 2019 ވަނަ އަހަރުގެ ފަހުކޮޅު ކުރިއަށް ގެންދިޔަ އޮޕަރޭޝަންގައި 2020 ވަނަ އަހަރުގެ ޖަނަވަރީ މަހުގެ ތެރޭގައި އެ މުވައްޒަފު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. އޭނާ ބަންދުކޮށްފައިވަނީ ކުޑަކުދިންތަކެއް ލައްވާ ބަންގިގޮވާ ނަމާދުކުރުވައި، އެކުދިންނަށް ނަޞޭޙަތްދީ، ދީނީ އެއްބައިވަންތަކަން ނަގާލުމުގެ ތުހުމަތުގައި ކަމަށް އޭނާ ބުނާކަމަށް ކައުންސިލްގެ ބަޔާނުގައި ވެއެވެ.
 
އެހެންނަމަވެސް ދަޢުލަތުން އޭނާ އާއި ދެކޮޅަށް ކޮށްފައިވަނީ، ތުހުމަތުކުރި މައްސަލައިގެ ދައުވާއެއް ނޫން ކަމަށާއި ދަޢުލަތުން ކޮށްފައިވާ ދައުވާއަކީ ޓެރެރިސްޓް ޖަމާޢަތަކަށް ތާއީދުކުރާ މީހެއްކަމަށް ދޭހަވާފަދަ ފޮޓޯއެއް ގެންގުޅުނު ކަމުގެ ދައުވާ ކަމަށާ އޭނާ ހައްޔަރުކުރިތާ ދެމަހެއްހާ ދުވަސްފަހުން އޭނާ ވަނީ ޝަރުތުތަކަކާއެކު ބަންދުން ދޫކޮށްލާފައި ކަމަށް ބަޔާނުގައިވެއެވެ. އަދި އިސްލާމިކް މިނިސްޓްރީން ވަނީ އޭނާ ވަޒީފާއަށް ނެރުމަށާއި ބަންދުގައި ހުރި ދުވަސްތަކަށް މުސާރަ ދިނުމަށްވެސް އަންގާފައި ކަމަށް ކައުންސިލުން ބުނެއެވެ.
 
ކައުންސިލުން ބުނީ އޭނާ ވަޒީފާއިން ވަކިކޮށްފައިވަނީ ދިވެހި ސިވިލް ސަރިވސް ޤަވާއިދު 2014 ގެ 271 ވަނަ މާއްދާގެ (ނ) ގެ 18 ވަނަ ނަންބަރުގެ ދަށުން (ޤާނޫނެއްގެ ދަށުން އެޤާނޫނެއްގެ ބެލެނިވެރިކަން ލިބިފައިވާ ފަރާތުން ކުރާ ތަހުޤީޤަކުން މުވައްޒަފު ކުށެއްކޮށްފައިވާކަން ސާބިތުވުން) ކަމުގައި ބަޔާންކޮށް ކަމަށެވެ. އެހެންނަމަވެސް މިމައްސަލައަކީ މިހާރުވެސް ޝަރީޢަތުގައި ހިނގަމުންދާ މައްސަލައަކަށްވެފައި، އޭނާ އާއި ދެކޮޅަށް ޝަރީޢަތުގައި އެއްވެސް ކަމެއް ސާބިތުވެގެން ހުކުމެއް ކޮށްފައިވާކަން އަދި މިހާތަނަށް މިކައުންސިލަށް އެނގިފައި ނުވާކަމަށް ކައުންސިލުން ބުނެއެވެ.
 
މިމައްސަލައާއި ގުޅިގެން އިސްލާމިކް މިނިސްޓްރީގެ އެޗް.އާރު.އެމް.ޑީ ކޮމެޓީން އޭނާ ވަޒީފާއިން ވަކިކުރުމުގެ އިސްލާޙީ ފިޔަވަޅު އެޅުމަށް ނިންމިކަމަށް އަންގައި، 2020 ވަނަ އަހަރުގެ އޮގަސްޓްމަހުގެ ތެރޭގައި ވަނީ މައްސަލައާއިމެދު ޖަވާބުދާރީވުމަށް 5 ދުވަހު މުއްދަތެއް ދީފައި ކަމަށާއި މިމުއްދަތުގެ ތެރޭގައި މުވައްޒަފު ވަނީ ވަރަށް ތަފްޞީލްކޮށް ކަންހިނގައި ދިޔަގޮތް ބަޔާންކޮށް ޖަވާބުދީފައި ކަމަށާއި އަދި އޭގެ ފަހުން، ވަޒީފާއިން ވަކިކުރުމުގެ ޗިޓް ފޮނުވުމާއި ހަމައަށް އިސްލާމިކް މިނިސްޓްރީގެ ފަރާތުން އިތުރު މުއާމަލާތެއް ކޮށްފައިނުވާކަން މުވައްޒަފު ފާހަގަކޮށްފައި ވާކަމަށް ބަޔާނުގައި ވެއެވެ.
 
އެހެންނަމަވެސް، 2020 ނޮވެންބަރު މަހު އިސްލާމިކް މިނިސްޓްރީގެ ފަރާތުން ކައުންސިލުން އެ މުވައްޒަފާއި ގުޅުންހުރި މައުލޫމާތުތަކެއް ހޯދާފައިވާ ކަމަށާއި، އެގޮތުން އޭނާގެ މައްޗަށް ތުހުމަތު ކުރެވުނު ޓެރެރިޒަމަށް ހިތްވަރުލިބޭ ވާހަކަ ދައްކާކަމަށް ތުހުމަތުކުރެވޭ މައްސަލައިގެ ތަހުޤީޤު ނިންމާ ބަންދުން ދޫކޮށްލިފަހުން އޭނާގެ ޢަމަލުތައް ހުންނަ ގޮތާއި، އޭނާގެ އުޅުން އޭގެފަހުން އިޞްލާޙުކޮށްފައިވޭތޯއާއި، އަދި ތުހުމަތު ކުރެވުނު މައްސަލައާއި ގުޅުންހުރި ކަންކަން ކުރާކަމުގެ އެއްވެސް މައުލޫމާތެއް ކައުންސިލަށް ފާހަގަ ކުރެވިފައިވާނަމަ އެކަން އަންގައިދިނުމަށް އެދިފައިވާ ކަމަށާއި، މީގެ ޖަވާބުގައި އެފަދަ އެއްވެސް ކަމެއް، ބަންދުކުރުމުގެ ކުރިންވެސް އަދި ފަހުންވެސް ކޮށްފައިވާކަން ކައުންސިލަށް އެނގިފައިނުވާކަމާއި، އޭނާއަކީ ރަށުގައި ބަންގިގޮވާ އިމާމުވެ ނަމާދު ކުރާނެ މީހަކު ނެތި ދިޔަ ދަނޑިވަޅެއްގައި، މިމަޤާމާއި ޙަވާލުވެ މަސައްކަތްކުރަން ފެށި ފަރާތެއްކަމާއި، ރަށުގައި މަރުވާ މީހުން ހިނެވުމާއި ކަށުކަމާކެމީގެ ކަންކަމުގައި ކައުންސިލުން އެދުނު ކޮންމެ ފަހަރެއްގައި އެކަން ކުރުމުގައި އެންމެ އިސްސަފުގައި ހުންނަކަމާއި، ޖެހިޖެހިގެން ގިނަ ހަފްތާތަކެއްގައި ހުކުރު ކުރަން އެދުނު ކަމުގައިވީނަމަވެސް، އެއްވެސް ޝަކުވާއެއްނެތި، ކައުންސިލުން އެދުނު ކޮންމެ ފަހަރަކު އެކަން ކޮށްދީފައިވާކަން ބަޔާންކޮށްފައިވާނޭ ކަމަށް ކައުންސިލުން ބުނެފައިވެއެވެ.
 
އޭގެ އިތުރުން ރަށުގައި ކުރިއަށް ގެންދާ ދީނީ ހޭލުންތެރިކަން އިތުރުކުރުމާއި، ދީނީ ޞައްޙަ މަޢުލޫމާތު ފޯރުކޮށްދިނުމުގެ މަސައްކަތްތަކުގައާއި، ވަކިން ޚާއްސަކޮށް މިސްކިތްތަކުގައި ބޭއްވޭ ދަރުސްތައް އިންތިޒާމްކުރުމުގައި، އިސްލާމިކް މިނިސްޓްރީގެ ޓީމްތަކަށާއި ކައުންސިލަށް އެންމެ ބޮޑު އެހީތެރިކަމެއް ވެދިން ފަރާތަކީވެސް އޭނާކަން ފާހަގަކޮށްފައިވާނޭ ކަމަށާއި ދީނީ ހަރުކަށި ފިކުރުގެ މީހުންނަކީ ޢާންމުކޮށް މިސްކިތު ޖަމާޢަތުގައި ބައިވެރި ނުވާ، ހުކުރު ނަމާދުގައި ބައިވެރިނުވާ، އަދި ކަށުކަމާކެމީގެ ކަންކަމުގައިވެސް ބައިވެރިނުވާ ފަރާތްތަކެއްކަމާއި، މިއާއި ޚިލާފަށް، އެ މުވައްޒަފު ފާހަގަކުރެވިފައިވަނީ، ކަށުކަމާކެމީގެ ކަންކަމާއި، ހުކުރު ކުރުމުގައި އެންމެ އިސްކޮށް މަސައްކަތްކުރާ، އަދި  މިސްކިތު ޖަމާޢަތަށް ދިއުމަށް މީހުންނަށް ބާރުއަޅާ ފަރާތެއްގެ ގޮތުގައި ކަންވެސް ފާހަގަކޮށްފައިނޭކަމަށް ކައުންސިލުން ބުނެއެވެ.

ޓެރަރިޒަމްއަށް ހިތްވަރުލިބޭ ވާހަކަ ދެއްކުމާއި ޓެރެރިސްޓް ޖަމާޢަތަކަށް ތާއިދުކުރާކަހަލަ އެއްވެސް ކަމެއް އެއްވެސް އިރެއްގައި އޭނާގެ ފަރާތުން ފާހަގަވެފައި ނުވާއިރު، އޭނާއަކީ ދީނުގައި އަންގަވާފައިވާ ގޮތާއި ރަސޫލާ (ޞ) ގެ ސުންނަތާއި އެއްގޮތަށް އުޅުމަށް މަސައްކަތްކުރާ ފަރާތެއް ކަމުގައިވެސް ބަޔާންކޮށްފައިވާނޭކަމަށް ކައުންސިލުން ބުނެއެވެ.
 
ކައުންސިލުން ފާހަގަކުރި އެއްވެސް ކަމަކަށް ރިޢާޔަތްކުރުމެއްނެތި، މައްސަލައަށް މުވައްޒަފު ޖަވާބުދާރީވިތާ އަހަރެއްހާ ދުވަސްފަހުން، އަދި ކައުންސިލްގެ ފަރާތުން މަޢުލޫމާތު ހޯދިތާ 9 މަސްފަހުން އިތުރު ނޯޓިސްއެއް ދިނުމަކާއި ނުލައި، އަދި މިކައުންސިލަށް އެއްވެސް މައުލޫމާތެއް ހިއްސާނުކޮށް ކުއްލިއަކަށް ވަޒީފާއިން ވަކިކުރިކަމުގެ ޗިޓް ފޮނުވުމަކީ ކައުންސިލުން ނުހަނު ކަންބޮޑުވާ ކަމެއްކަމުގައި ކައުންސިލްގެ ބަޔާނުގައި ބުނެފައިވެއެވެ. އަދި މައްސަލަ އާއިމެދު ޝަރީޢަތުން އޭނާގެ މައްޗަށް ކުށެއް ސާބިތުނުވަނީސް، މިފަދަ ބޮޑު އަދަބެއްދީ ވަޒީފާއިން ވަކިކުރުމުމަކީ އިންސާފުން ބޭރުންކޮށްފައިވާ ކަމެއްކަމަށް  ކައުންސިލުން ޤަބޫލުކުރާ ކަމަށާއި، މުވައްޒަފުގެ ވަޒީފާ އަލުން އަނބުރާ އިޢާދަކުރުމަށް ސިވިލް ސާވިސް ކޮމިޝަނަށާއި މިނިސްޓްރީ އޮފް އިސްލާމިކް އެފެއާޒަށް ގޮވާލާކަމަށް ކައުންސިލްގެ ބަޔާނުގައިވެއެވެ. 

މިކަމާއި ގުޅޭގޮތުން އިސްލާމިކް މިނިސްޓްރީއާއި ސިވިލް ސަރވިސް ކޮމިޝަނުގެ ބަހެއް އަދި ލިބިފައެއް ނުވެއެވެ. 

ގުޅޭ ލިޔުންތައް

މިލިޔުން ކިޔާލުމުން

0%
އުފާވި
0%
ދެރަވި
0%
ހިނިއައި
0%
ރުޅިއައި

0 ކޮމެންޓް

އިޖްތިމާއީ މިންގަނޑަށް ނުފެތޭ ކޮމެންޓްތައް ބަލައިނުގަނެވޭނެއެވެ.

މީސްމީޑިޔާ

ނިޔުސްލެޓަރ

ކޮންމެ ދުވަހެއްގެ މަޤުބޫލު ޚަބަރުތައް ލިބިލައްވަން ބޭނުންފުޅުވާނަމަ ތިރީގައި އީމެއިލް ޖެއްސެވުމަށްފަހު ސަބްސްކުރައިބް ކުރައްވާ.

އެންމެ ފަސް

ހޯދަންބޭނުންވާ ބަސް ޖެއްސެވުމަށްފަހު އިންޓަރއަށް ފިއްތަވާލައްވާ