މާލެ
ފައިނު
އިމްސާކް
04:14
04:14
ފަތިސް
04:34
04:34
އިރުއަރާ
05:52
05:52
މެންދުރު
12:09
12:12
އަޞްރު
15:32
15:35
މަޣްރިބް
18:17
18:22
ޢިޝާ
19:35
19:41
ޙަސަން ސާތިއު

ސާތިއު މިއީ އަރުތަ ފުޓްސަލް މުބާރާތުގެ އެންމެ ޖޯޝުހުރި އަޑު

އެއީ މި ދުވަސްވަރު ރ. އަތޮޅު ރައްޔިތުންނާ އެންމެ ގާތް އެންމެ ގިނައިން އިވޭ އަޑެވެ. ފުޓްސަލްގެ ޖޯޝު ގެނުވައި، ދަނޑުމަތީގެ ހޫނުކަން ބެލުންތެރިންނަށް ކިޔައިދޭ ކުޅަދާނަ ފަންނާނެވެ.

ރ. އިންނަމާދޫއަށް އުފަން ޙަސަން ސާތިއުއަކީ މިދިޔަ އަހަރު ބޭއްވި އަތޮޅު ފުޓްސަލް މުބާރާތާއި މި އަހަރުގެ އަތޮޅު ފުޓްސަލް މުބާރާތުގެ ވެސް މެޗްތަކުގެ ކޮމެންޓްރީ ދިނުމުގައި ފޫހިކަމެއްނެތި މަސައްކަތް ކުރަމުންދާ ފަރާތެވެ.

މި އަހަރާއި މިދިޔަ 2023 ވަނަ އަހަރު ވެސް އަތޮޅު ފުޓްސަލް މުބާރާތް އިންނަމާދޫގައި ކުރިއަށް ގެންދާއިރު، މުބާރާތުގައި އެންމެ ގިނަ ބައެއްގެ ސަމާލުކަން ލިބިފައިވާ އެއް ފަރާތަކީ ސާތިއުއެވެ. ސާތިއުގެ ބަސްމަގު ގެންގުޅޭގޮތާއި، ކޮމެންޓްރީގައި ގެންގުޅޭ އަމިއްލަ އުކުޅުތަކަކީ މަދު މީހަކަށް ނޫނީ ނުކުރެވޭވަރުގެ ހުނަރުވެރި މަސައްކަތެއްކަން ކަށަވަރެވެ.

ސާތިއުގެ މި މަސައްކަތާގުޅޭ މައުލޫމާތުކޮޅެއް ހޯދާލުމަށް އޭނާއާއި ވާހަކަ ދައްކާލީމެވެ.

ސާތިއު ބުނީ، އޭނާ އެންމެ ފުރަތަމަ މެޗެއްގެ ކޮމެންޓްރީ ދިނީ އެ ރަށުގައި އޮތް ފުޓްސަލް މުބާރާތެއްގައި ކަމަށެވެ. އަދި އެ މުބާރާތަށްފަހު ރ. އަތޮޅު ފުޓްސަލް މުބާރާތް އިންނަމާދޫގައި ބޭއްވުމަށް ހަމަޖެހުމާއި ގުޅިގެން ކޮމެންޓްރީ ދިނުމަށް އޭނާއަށް ފުރުސަތު ލިބުނީ ކަމަށެވެ. ސާތިއު ބުނީ އެ ފުރުސަތަކީ އަތޮޅު ކައުންސިލްގެ ރައީސްއާއި އިންނަމާދޫ ކައުންސިލްގެ ރައީސް ދެއްވި ފުރުސަތެއްކަމަށެވެ.
ސާތިއު ކޮމެންޓްރީ ދެނީ. - ފައިނު އޮންލައިން ފޮޓޯ: ޝާވިން
އަދި އެ މުބާރާތުގެ ތަޖުރިބާގައި މި އަހަރު ވެސް ރަށުގައި މުބާރާތް އޮންނާތީ  ލައިވް ކުރިއަށް ގެންދާ ބައިނަރީގެ ފަރާތުން ކޮމެންޓްރީދޭން ފުރުސަތު ލިބުނީކަމަށް ސާތިއު ބުންޏެވެ.

މެޗްތައް ފޭސްބުކް އަދި ޔޫޓިއުބުގައި ލައިވްކުރަމުން ދާއިރު އެންމެ ފާހަގަވާ އެއްކަމަކީ ކޮމެންޓްރީ ދެމުންދާ ހަލުވި ސްޕީޑު ކަމަށްވާއިރު މެޗަށް ތައްޔާރުވާން ކިހާވަގުތެއް ހޭދަކުރަންތޯ އަހާލުމުން ބުނީ، މުބާރާތުގެ އިންތިޒާމުގެ ކަންކަމާ އެ ނޫންވެސް ކަންކަމުގައި ބުރަކޮށް އުޅެންޖެހިފައި އޮންނާތީ އެންމެ ރަނގަޅަށް ތައްޔާރުވާން ވަގުތު ނުލިބޭ ކަމަށެވެ.

ނަމަވެސް ، މެޗްގެ ކުރިން ކޮންމެވެސްވަރަކަށް ޓީމްތަކުގެ މައުލޫމާތު އެއްކޮށްލާ ހަދާލާކަމަށް ސާތިއު ބުންޏެވެ.

ސާތިއުގެ ކޮމެންޓްރީގައި އެންމެ މަޖާކޮށް ކުރާ އެއްކަމަކީ ގޯލެއް ޖަހާވަގުތު ގެނެސްދޭ ގޮތެވެ.

“ވާސަރީ ވާ، ވާސަރީވަ”، މިއީ ސާތިއުގެ ފާހަގަކޮށްލެވޭ އެއް ބަހެވެ. 

ސާތިއު ބުނީ އެއީ އެހެން ބުނަން ކުރިން ތައްޔާރުވެގެން ބުނާ ބަސްތަކެއް ނޫންކަމަށާއި އެއީ ހަމަ އެ ވަގުތު ހިތަށް އަންނަ ބަސްތަކެއްކަމަށް އޭނާ ބުންޏެވެ.

ދަނޑުމަތީގައި ހުރި އަސަރު ބެލުންތެރިންނަށް ގެނެސްދިނުމަށް ސާތިއު ބޭނުންކުރާ ބަސްތައް ޓިކްޓޮކްގައި މިހާރު ވަނީ ވައިރަލްވެފައެވެ.

ޓިކްޓޮކްގައި މަޖާ ވީޑިއޯތައް ވެސް ކުޅޭ ސާތިއު ބުނީ، ކޮމެންޓްރީ ދެމުންދާއިރު ލަނޑު ވެސް ލިބޭ ކަމަށެވެ.

އިނގުރައިދޫ ޓީމްގެ މަންޑޭއާ ނަބީހުގެ ނަން އޮޅުވާލައިގެން އުޅެވިއްޖެ މުޅި މެޗްގައި. ދެ މީހުން ވައްތަރީއެއް ވެސް ނޫން. އެކަމު މުޅި މެޗްގައި ކިޔުނީ ގޯސްކޮށް. އެއީ ލިބިފައި އޮތް މައުލޫމާތުގެ ސަބަބުން ވީގޮތެއް އެކަމު. އެ ނޫނަސް ބައެއް ކުޅުންތެރިން އޮޅޭ. އެކަމަކު ވަކި ހިސާބަކުން އެކަން ހަމަޖައްސާލަން

ސާތިއު ބުންޏެވެ.

ސާތިއު ހުރީ މި ދާއިރާގައި މަސައްކަތް ކުރުމުގައި ކުރިއަށް ދާގޮތަށެވެ. ނަމަވެސް އޭނާ ބުނީ ރަށުގައި ވަޒީފާގައި އުޅޭތީ އެހެން ރަށްރަށަށް ގޮސް ކޮމެންޓްރީ ދޭން ދަތިވަނީ ކަމަށާއި މިހާރުވެސް އެކި ހިސާބުތަކުން ފުރުސަތު ލިބެމުންދާކަމަށެވެ.

އޭނާ ބުނީ ކޮމެންޓްރީ ދެނީ އެކަމަށް ޕްރެކްޓިސްތަކެއްކޮށް ދަސްކޮށްގެން ނޫންކަމަށާއި މެޗުތައް ބަލާފައިހުރީމަ އެނގިފައިހުރި ގޮތަށް އެކަން ގެންދަނީ ކަމަށެވެ. އަދި އަރަބި ލީގުތަކުގައި ކޮމެންޓްރީ ދޭގޮތް އޭނާއަށް ވަރަށް ކަމުދާ ކަމަށް ބުންޏެވެ.

އޭނާގެ އެންމެ ފާހަގަކޮށްލެވޭ އަނެއްކަމަކީ މެޗް ފެށިގެން ނިމެންދެން ވެސް މެޗްގައިވާ ހުރިހާ ކަމެއް، ހަމައެކަނި އަޑު އަހާ މީހާއަށް ވެސް ސިފަވެގެންދާގޮތަށް ގެނެސްދޭކަމެވެ. އޭނާ ބުނީ ކޮމެންޓްރީ ދޭއިރު ބަލަނީ އަޑު އަހާ މީހާއަށް އަޑުން އެކަނިވެސް މެޗްގެ ކުޅުންގަނޑު އެނގޭވަރު ކުރަން ކަމަށެވެ.

ސާތިއު ބުނީ، މި މުބާރާތުގެ ކޮމެންޓްރީ ދިނުމުގެ ފުރުސަތު ދެއްވުމުންނާއި އެކަމުގައި އެހީތެރިކަން ދެއްވާތީ އަތޮޅު ކައުންސިލްގެ ރައީސް ޙުސައިން ނާސިފާއި އިންނަމާދޫ ކައުންސިލްގެ ރައީސް އަޙްމަދު އަޒުމީން އަދި މަޑުއްވަރީ ކައުންސިލްގެ ރައީސް މުޙައްމަދު ޞާދިގަށް ހާއްސަ ޝުކުރެއް އަދާކުރާކަމަށެވެ. 

ސާތިއުގެ ކޮމެންޓްރީއާއި ގުޅޭގޮތުން ބެލުންތެރިން ވެސް ބުނަނީ އެއީ ތަފާތު ހުނަރުވެރިއެއް ކަމަށެވެ.

ކޮމެންޓޭޓަރު އެ ބޭނުންކޮށްލާ ބަސްތައް ވަރަށް ސަޅި. ބައެއްފަހަރު ގޯލް ސެލެބްރޭޝަންތަކުގައި އެ ކިޔާލާގޮތުން ހިނިވެސް އާދޭ. އަޅުގަނޑުގެ ދަރިފުޅަށް ވެސް ވަރަށް ކަމުދާނެ. ދެން އަންނަ މުބާރާތެއްގައި ވެސް ސާތިއުގެ އަޑު ނީވެންޏާ ވަރަށް ފަޅުވާނެ

ބެލުންތެރިއަކު ފައިނު އޮންލައިންއަށް ބުންޏެވެ.

އަތޮޅު ފުޓްސަލް މުބާރާތުގައި ދެން ކުރިއަށް އޮތީ މާދަމާ ކުޅޭ މުބާރާތުގެ ފައިނަލް މެޗެވެ. މުބާރާތް ނިމެންދާއިރު ސާތިއު ހުރީ މުބާރާތުގެ މެޗްތަކުގައި ކޮންމެ ދުވަހަކު އޭނާ ގެނެސްދިން ކޮމެންޓްރީއާމެދު ހިތްހަމަޖެހިފައެވެ. ނަމަވެސް ބުނީ، ރަނގަޅުކުރަންޖެހޭ، ދަސްކުރަންޖެހޭ ގިނަ ކަންތައްތަކެއް އެބަހުރި ކަމަށާއި ކުރިއަށް ދާނީ އެކަންކަން ބަލާ ހޯދައިގެން ކަމަށެވެ.

އަރުތަ ފުޓްސަލް މުބާރާތުގެ މެޗްތައް ފޭސްބޫކް އަދި ޔޫޓިއުބުން ވަގުތުން ބަލަމުންދާ ގިނަ ބަޔަކު ބުނާގޮތުގައި ކުރިއަށް އޮތް އަތޮޅު ފުޓްސަލް މުބާރާތް ތަކުގައި ވެސް ސާތިއުގެ ކޮމެންޓްރީ ނެތްނަމަ ދެން ވަރަށް ފަޅުވާނެކަމަށެވެ. މިހާރު އެއީ އަތޮޅު ފުޓްސަލް މުބާރާތުގެ އަޑެވެ. އަރުތަ ބްރޭންޑްގެ އެއް ހިއްސާދާރެވެ.

ގުޅޭ ލިޔުންތައް

މިލިޔުން ކިޔާލުމުން

60%
އުފާވި
40%
ދެރަވި
0%
ހިނިއައި
0%
ރުޅިއައި

1 ކޮމެންޓް

އިޖްތިމާއީ މިންގަނޑަށް ނުފެތޭ ކޮމެންޓްތައް ބަލައިނުގަނެވޭނެއެވެ.

އަލިބެ 4 months ago

ސާތިއު އެހެންލެވެލްއެއް

ރައްދު

އިޖްތިމާއީ މިންގަނޑަށް ނުފެތޭ ކޮމެންޓްތައް ބަލައިނުގަނެވޭނެއެވެ.

މީސްމީޑިޔާ

ނިޔުސްލެޓަރ

ކޮންމެ ދުވަހެއްގެ މަޤުބޫލު ޚަބަރުތައް ލިބިލައްވަން ބޭނުންފުޅުވާނަމަ ތިރީގައި އީމެއިލް ޖެއްސެވުމަށްފަހު ސަބްސްކުރައިބް ކުރައްވާ.

އެންމެ ފަސް

ހޯދަންބޭނުންވާ ބަސް ޖެއްސެވުމަށްފަހު އިންޓަރއަށް ފިއްތަވާލައްވާ