ފައިނު އަތިރިމަތި ހިމާޔަތް ކޮށްދީ - ރައްޔިތުންގެ އާދޭސް

އިބްރާހިމް ފަހީމް 11 ޖެނުއަރީ 2020, ހޮނިހިރު, 16:35

މީގެ ދުވަސްކޮޅެއް ކުރިން ފައިނު އަތިރިމަތިން ފެންނަން އޮތް ހިތްގައިމު މަންޒަރު މިވަނީ ގެއްލިގެން ގޮސްފައެވެ. އިރުވައި މޫސުމުގެ ހަޅައިގައި ގޮނޑު ރާޅު ބޮޑުވެ ރަށުގެ އުތުރުފަރާތުން ވަރަށް ބޮޑު ބައެއް ގިރާލައިގެން ގޮސް އެސަރަޙައްދުގައި ހުރި 200 އަހަރަށްވުރެ ގިނަ ދުވަސްވީ ބޮޑެތި ކާނިގަސްތައްވެސް މިހާރު އެވަނީ ލޮނުގަނޑު ތެރޭގައެވެ.

އަތިރިމަތީގެ ބައެއް ރުއްގަސް ވެއްޓެނީ

މީގެ މަހެއްހާ ދުވަސްކުރިން ރަށުގެ އުތުރު އަތިރިމަތި. މިސަރަޙައްދު މިހާރުވަނީ އެކަށް ގިރާލައިގެން ގޮސްފައި

ފައިނު ގިރުމުގެ މައްސަލަ އާދަޔާޚިލާފަށް ބޮޑުވެ އަތިރިމަތީ ހުރި ޒަމާންވީ ކާނިގަސްތައް ވެއްޓެނީ. މިކަމަށް އިތުރަށް ބަލަން ނުތިބެ، އަމަލީގޮތުން ވަރަށް އަވަސް ހައްލެއް ބޭނުންވޭ. @DrHussainHassan @AslamAslamtey https://t.co/85RLBGcLIE pic.twitter.com/O9bpN92mUj
— Hassantay2019 (@HassantayMDP) January 10, 2020

ރާއްޖޭގެ ގިނަ ރަށްރަށެކޭވެސް އެއްފަދައިން ފައިނަކީވެސް ރަށް ގިރުމުގެ މައްސަލަ ކުރީއްސުރެވެސް ދިމާވެފައިވާ ރަށެކެވެ. ނަމަވެސް، މިއަހަރުގެ އިރުވައިގައި މިމައްސަލަ މިވަނީ ފޫނުބެއްދޭވަރުގެ ބޮޑު މައްސަލައަކަށް ވެފައެވެ. ރަށުގެ މޫނުމަތީ ހުރި ބިޔަ ބޮޑެތި ގަސްތައް ލޮނުގަނޑުގެ ތެރޭގައި އަރިޅާލާފައި ހުންނަ މަންޒަރަކީ ބަލަން ދަތި މަންޒަރެކެވެ. މިގަސްތަކަކީ އެތަށް ޒަމާނެއްވަންދެން ރަށުގެ އަތިރިމަތީގެ ރައްކަލެއްގެ ގޮތުގައި މުހިންމު ދަޢުރެއް ޢަދާކުރި ގަސްތަކެކެވެ. ފިނިހިޔާތަކެއްގެގޮތުގައި އެތައްބަޔަކަށް ހިތްހަމަޖެހުން ހޯދައިދިން ގަސްތަކެކެވެ.

ރަށުގެ އެކި ސަރަހައްދުތަކުން އެކި ދުވަސްވަރު ގިރުމަކީ އާންމު ކަމެކެވެ. ޚާއްޞަކޮށް ބޮޑު ހިލަޖަހާ ހިމާޔަތް ކުރުމުގެ ކުރިން ރަށުގެ އިރުމަތީކޮޅަކީ ގިރާ ސަރަޙައްދުގެ ގޮތުގައި މަޝްހޫރު ސަރަޙައްދެކެވެ. ކުރިން ހަދަންފެށި ބަނދަރުގެ މަސައްކަތް ކޮންމެ ސަބަބަކާއި ހުރެވެސް ހުއްޓުމުގެ ސަބަބުން އަދި އަލުން ބަނދަރު ހެދުން ނުފެށި ގިނަ ދުވަސްތަކެއް ވުމުގެ ސަބަބުން، ރަށުގެ އުތުރުފަރާތުން ވަރަށްބޮޑަށް ގިރާލައިގެންގޮސް 200 އަހަރަށްވުރެ ގިނަދުވަސްވެފައިވާ ކާނިގަހެއް ވަނީ މަރުވެފައެވެ.

2014 ވަނަ އަހަރުގެ ތެރޭގައި ރަށުގެ އުތުރު ފަރާތް ގިރާލާފަައި

އަދި ފަހުން އެންމެ ބޮޑަށް ގިރާލާފައިވަނީ 2016 ވަނަ އަހަރު މިހާރުގެ ބަނދަރު ހަދަމުން ދަނިކޮށެވެ. އެފަހަރުވެސް ރައްޔިތުން ނިކުމެ ގަސްތައް ކައިރީ ވެލިގޯނި ޖައްސާފައިވެއެވެ. އޭގެ ފަހުން ފާއިތުވި 3 އަހަރުވެސް ގަސްތަކުގެ މޫތަކާއި ހަމައަކަށް ގިރާލައިގެން ނުދެއެވެ. ނަމަވެސް، މިއަހަރުގެ އިރުވައިގައި އާދަޔާއި ޚިލާފަށް ގަދަވެ އެސަރަހައްދުގައި އޮތް ދޮންވެލިގަނޑު 25 ވަރަކަށް ދުވަސް ތެރޭ މިހާރު މިވަނީ ގިރާލައިގެންގޮސް އެސަރަޙައްދުގެ ރުއްގަސް ވެއްޓެން ފަށާފައެވެ.

200 އަހަރަށްވުރެ ގިނަ ދުވަސްވެފައިވާ ގަހެއް ހިމާޔަތް ކުރުމަށް ރައްޔިތުން ނިކުމެ ވެލިގޯނި ޖައްސާފައި

މިކަމަށް ހައްލެއް ހޯދުމަށް އެކި ފަހަރުމަތިން ރަށު ފެންވަރުގައި މިހާރުވަނީ މަސައްކަތް ކޮށްފައެވެ. އެގޮތުން، ދުވަސްވީ ގަސްތަކުގެ ކައިރީ ވެލިގޯނި ޖެއްސުމުގެ މަސައްކަތް ރަށު ކައުންސިލާއި ރަށުގެ ރައްޔިތުން ގުޅިގެން އެތަށްފަހަރަކު ވަނީ ކޮށްފައެވެ. ނަމަވެސް، ވެލިގޯނި ޖެހުމަކުން އެސަރަޙައްދުގެ ގިރުމަށް އެއްވެސް ބަދަލެއް އައިސްފައެއް ނުވެއެވެ. އަދި ގަސްތަކަށްވެސް ރައްކާތެރިކަމެއް ލިބިގެން ގޮސްފައެއް ނުވެއެވެ. އެތައް ދުވަހެއްގެ މަސައްކަތުން ވެލި ގޯނި އެކިފަހަރު ޖައްސައިގެންވެސް މިކަމަށް ހައްލެއް ނުލިބުމުން، އޭގެތެރެއިން ވެއްޓެން އަރިވެފައި މިހާރުހުރި ގަސްތަކުގައި ވާޖަހައިގެން ހިފެހެއްޓޭތޯ ބެލުމަށް އެމަސައްކަތްވެސް ކައުންސިލާއި ރައްޔިތުން ގުޅިގެންވަނީ ކޮށްފައެވެ.

ނަމަވެސް، ވާޖެހުމަކުން މިފަދަ ބޮޑެތި ގަސްތައް ހިފެހެއްޓިދާނެކަމަށް ނުފެނެއެވެ. މިކަމަށް ޙައްލެއް ލިބެން އޮތީ ސަރުކާރުގެ ލެވެލްގައި އަވަސް މަޝްވަރާތަކެއް ކުރެވި ޢަމަލީ ގޮތުން އަވަސް މަސައްކަތްތަކެއް ކުރެވިގެނެވެ.

Bunevey gothuga mi gasthah indhee meege 300 varakah aharu kurin. Kaabafain eyru ekan kuree aharemennahtakai. Mi gasthakun ethah jeelakah hiyaa dhin. Ekamu loa kurimathee faharaku gaheh vettigen dhaairu balahattaigen thibun noon gotheh hama netheebaa? @DrHussainHassan @naeembe pic.twitter.com/eVDyBCrQKl
— Abdullah Waheed (@abulhomv) January 10, 2020

ފައިނަކީ މިބޮޑުޗުއްޓީގައިވެސް އެކި ރަށްރަށުގެ މީހުން ޕިކްނިކް ދިޔުމަށް ގިނަ ޢަދަދަކަށް ޒިޔާރަތްކުރި ރަށެކެވެ. ތަފާސްހިސާބުތަކުން ދައްކާގޮތުން މިބޮޑުޗުއްޓީގައި 400 އަށްވުރެ ގިނަ މީހުން ޕިކްނިކް ދިޔުމަށް މިރަށަށް ޒިޔާރަތް ކޮށްފައިވެއެވެ. ރަށަށް ޒިޔާރަތްކުރާ ފަރާތްތަކެކޭވެސް އެއްފަދައިން ފައިނުގެ ރައްޔިތުންގެ އެދުމަކީވެސް ފައިނު އަތިރިމަތި ކޮންމެ އިރުވައެއްގައި ގިރާނުލާނެ ގޮތަކަށް ހިމާޔަތް ކުރެވޭނެ ގޮތެއް ވެގެން ދިޔުމެވެ. ފައިނު ރައްޔިތުން އަދުގެ ސަރުކާރުގެ އަރިހުން އެދޭ އާދޭހަކީ މިއެވެ.

އިތުރު ލިޔުންތައް ރަށް ގިރުން

ގުޅޭ ލިޔުންތައް

3 ކޮމެންޓް

ގުޅޭ ލިޔުންތައް

މިލިޔުން ކިޔާލުމުން

3 ކޮމެންޓް ކެންސަލް

ރައްދު ކެންސަލް

ރައްދު ކެންސަލް

ރައްދު ކެންސަލް

މީސްމީޑިޔާ

ނިޔުސްލެޓަރ

އެންމެ ފަސް